المقاولة المصرية هى أبهى صور الفتاكة المباركية فى عصرنا النحيس .. فرئيسنا الأسد الجسور أكد فى قمة الكويت أن "المقاولة" تقاس بحسابات خاصة - قبل أن يتدارك نفسه ويصححها إلى المقاومة - والحقيقة أن رئيسنا الهمام كان أكثر الحاضرين صدقا مع نفسه ، الراجل جاب من الآخر هو ما راحش الكويت إلا من أجل المقاولة .. لكن كلام المقاومة والصواريخ والحاجات دى فسيادته قال رأيه فيها هو ورجالته فى أكتر من مناسبة منها على سبيل المثال (الصواريخ العبثية - الألعاب النارية - حماس هى المسئولة عن الوضع فى غزة - اللى هيعدى الحدود ورحمة أمى لأكون كاسر رجله) لكن طبعا مع التطورات الأخيرة وصمود المقاومة الأسطورى كل حاوى لم تعابينه ، و"حماس هى المسئولة عن اللى بيحصل" اتحولت ل"على إسرائيل الوقف الفورى لإطلاق النار" وطبعا علشان إسرائيل تكمل المسلسل أولمرت أكد إنه هيوقف إطلاق النار علشان أخد بكلام سيادة رئيسنا الهمام ، ده طبعا اللى واضح على المسرح ، لكن فى الكواليس كان الاتفاق ان اسرائيل هتخلص الليلة فى يومين وتتحكم فى القطاع ومن ثم تسلمة للسلطة الشرجية بتاعت أبو مازن علشان تعيد الأمور لطبيعتها -الصهيونية طبعا- لكن بعد ما فشلت الطبخة الجماعة اتلخبطوا ,,, يا ترى نعمل ايه نعمل ايه ؟! حسحس جابها أخيرا بالمبادرة اللى اطبخت اصلا فى تل ابيب وريحة طلعت قبل ما الحرب تبدأ أصلا .. طيب المبادرة ما نفعتش نعمل ايه نعمل ايه ؟؟ صاحبنا خد على قفاه وطلعت شريكته على واشنطن من غير ما تديله حس ولا خبر .. صاحبنا الشهامة خدته ولهجته اتغيرت تماما زى ما لهجة جيمى اتغيرت اثناء القاء للخطاب بتاع الحزن الوطنى فى العريش لما قالها بالفم المليان .. "اسرائيل لا تفهم الا لغة القوة ولذلك لن نحدثها الا باللغة التى تفهمها " انا قلت ربنا يستر مصر هتعلن الحرب بكرة ولا يمكن بعد بكرة ، فوجئت بأبو هيثم بيقول " القوة لن تحقق السلام لإسرائيل" قلت يمكن لسه اللغة التى تفهمها جاية فى الجملة اللى وراه وادينى مستني ربنا يمتع اللى وراها بالسلامة ويخليلنا لجنة السياسات وأبو هيثم .
أما بخصوص المقاولة فيروى أن جد هيثم أعطى لأبو هيثم فى يوم جنية وقاله انزل اشتريلك حاجة ، أبو هيثم فكر يعمل ايه بالجنية ؟!.. راح لأجنس العربيات وقاله بابا بيقولك هات عربية مرسيدس احدث حاجة عندك ؟!، طبعا الراجل شاف أبو هيثم واتنفض وجابله العربية ، أبو هيثم قاله عاوز كام؟! صاحب الأجنس حلف ميت يمين أنه ما ياخد مليم ، طبعا أبو هيثم ما رضيش وأبى إلا أن يعطيه حقه ، الراجل قاله خلاص أنا هاخد منك تمنها ربع جنية بركة منك!!! ، أبو هيثم طبعا طلع بسرعة الجنية وقاله خد الربع بتاعك وهات بالباقى عربيات....
